हाम्रो आवाज

२
कुनै ह्यान्डसम वा ब्युटीले कार हाँकेर आइरहेका छन् भने गएर ठोक्किइहाल्नुस् । तपाईं मर्नुहुन्न । सामान्य चोट मात्र लाग्नेछ र त्यसरी उठाएको जोखिमले फाइदा नै दिनेछ । उनैसँग तपाईंको चक्कर चल्न सक्छ । अर्थात् मनमा चोट लाग्नेछ र माया पलाउनेछ ।

३
आफूलाई मन परेको युवकको हातमा चोट लागेको देख्नुभयो भने चुप लागेर नबस्नुस् । आफ्नो सारी वा कुर्ताको सल च्यातेर घाउमा बेरिदिनुस् । यसले युवकलाई मनमा समेत चैन दिनेछ । तपाईंको सारी वा कुर्ताको टुक्रा कति प्रभावकारी हुन्छ भने, कुनै औषधिविना नै घाउ चट हुनेछ ।

४
सहरदेखि टाढा हरियाली ठाउँमा पिकनिक खान जाँदै हुनुहुन्छ भने जंगल वा छाँगाको भ्रमण गर्न नछुटाउनुस् । त्यहाँ गाउँकी कुनै सोझी तर सुन्दर युवती नाचिरहेकी हुन सक्छिन् । त्यसपछि रूख र ढुंगामा लुकेर फोटो खिच्नुस् । घटनाहरूले तपाइंलाई प्रेमको बाटामा डोर्‍याउनेछन् ।

५
कुनै पाको उमेरको मान्छे भेटेमा राम्रो व्यवहार देखाउनुस् । तपाईंको मानवताबाट प्रभावित भई उक्त व्यक्ति तपाईंलाई आफ्नो ज्वाइँ वा बुहारी बनाउने निचोडमा पुग्न सक्छ । बरु, तपाईंचाहिँ कुनै बहाना लिएर उक्त व्यक्तिको घरमा पुग्नुस् । उनका छोरा वा छोरीसँग भेट त हुनैपर्‍यो नि !

६
कुनै युवती बेसहारा छिन् भने उनलाई प्रत्यक्ष थाहा नहुने गरी सहयोग गर्नुस् । उनीसँगको सम्बन्धलाई पनि जारी राख्नुस् । अनि, एकदिन आफूले सहयोग गरिरहेको कुरा उनको कानसम्म पुर्‍याउन कुनै पात्रलाई प्रयोग गर्नुस् । तपाईंको सहयोगको ऋण उनले प्रेम दिएर चुक्ता गर्नेछिन् ।

७
मन परेकी युवतीको बिहे हुन लागेको छ भने हिम्मत नहार्नुस् । तपाईंलाई युवतीले बिहेको कार्ड पक्कै दिनेछिन् । तपाईं कोठामा उदास भएर नबस्नुस् । बिहेको जग्गेमै पुग्नुस् र कुनै हरकत देखाउनुस् । अन्ततोगत्वा युवतीको बिहे तपाईंसँगै हुनेछ ।

८
युवतीका बाबु करोडपति छन् र तपाईं गरिब हुनुहुन्छ भने अप्ठ्यारो नमान्नुस् । आफ्नो प्रेममा अडिग रहनुस् । करोडपति बाबुले आफ्नी छोरीको हात आफ्ना बिजनेस पार्टनरका छोरालाई सुम्पिने इच्छा देखाउन सक्छन् । तर, त्यतिबेला पनि हरेस नखानुस् । किनभने, सम्धीको धनदौलत हडप्नकै लागि बिजनेस पार्टनरले नाता गाँस्न खोजेको कुरा एकदिन भन्डाफोर हुनेछ र करोडपति बाबु तपाईंलाई खोजीखोजी आइपुग्नेछन् ।

९
त्रिकोणात्मक प्रेम छ भने साथीको मुख हेरेर त्याग गर्नुस् तर सहरदेखि नभाग्नुस् । दैवले एकदिन तपाईंको प्रेम तपाईंलाई नै फर्काइदिनेछ । त्यस्तो अवस्थामा तपाईंको प्रेममा बाधा पुर्‍याउने व्यक्ति चाहे त्यो मित्र नै किन नहोस् भगवान्को पि्रय हुनेछ । र, तपाईंका लागि मैदान खाली हुनेछ ।

१०
युवतीका बाबुलाई फकाउन हातमा ठेला उठ्ने गरी भरियाको काम गर्नसमेत तयार हुनुहोस् । तपाईंलाई खाना खुवाउन र सहानुभूति दिन युवती टिफिन बोकेर आउनेछिन् । त्यतिबेला युवतीलाई आफ्नो हत्केला देखाउन नभुल्नुस् । हातको ठेला देखेर युवती भावुक बन्नेछिन् ।

११
कुनै युवतीसँग प्रेम हुन आँटेको छ भने गीत गाउन सिकिहाल्नुस् । किनभने, लभ परेपछि बगैँचामा गीत गाएर नाच्नुपर्ने हुन्छ । नत्र तपाईंको प्रेम अरूले कसरी थाहा पाउने ? शंकै छैन, बगैँचामा नाच्नलाई नयाँ लुगा र जुत्ता किन्नैपर्‍यो ।

१२
राम्री युवती वा राम्रा युवकसँग जम्काभेट भएमा आँखा जुधाउँदै टोलाउन थाल्नुस् । अरूतिर ध्यान नदिनुस् । एकाग्र हुनुस्, साथीले तपाईंको आँखाअगाडि हत्केला नहल्लाएसम्म । त्यसपछि झस्किनुस् । यसो गरे तपाईंको लगाव झल्किनेछ ।

१३
होस गर्नुस्, प्रेम गर्नेहरू ब्लड-क्यान्सरको सिकार भई प्रेमी वा प्रेमिकादेखि मात्र होइन धर्तीदेखि नै अलग हुनुपर्ने मोडमा पुग्न सक्छन् । त्यसैले क्यान्सरदेखि बेलैमा
सावधानी अपनाउनुस् । क्यान्सर प्रेमका लागि हानिकारक छ ।

१४
आफूलाई मन परेकी युवतीको फोटो पर्समा बोक्नुभएको छ कि छैन ? छैन भने बोक्नुस् र एकपटक कुनै दिन पर्सलाई केटीको नजरमा पारिदिनुस् । मन त हो, पग्लिन कति बेर लाग्छ र ? आफ्नो डि्रम गर्ललाई साथीभाइको नजरबाट सुरक्षित राख्ने उपाय पनि हो यो ।

१५
बदमास केटाहरूले युवतीलाई लडाउन भुइँमा केराको बोक्रा राखिदिन सक्छन् । तर, तपाईं त्यसलाई सफा गर्नतिर नलाग्नुस् । बरु, युवती त्यहाँ आइनपुगुन्जेल प्रतीक्षा गर्नुस् । जब युवती चिप्लिएर अनियन्त्रित
हुन्छिन् तपाईं गएर उनलाई सम्हाल्नुस् । चिठ्ठा तपाईंलाई पक्का ।

१६
सानो उमेरमै कुनै केटा वा केटी मन परेको छ भने, छुट्टिने बेला रुमाल, खेलौना वा माला चिनोस्वरूप दिनुस् । हुर्किएपछि संसारको जुनसुकै कुनामा पुगे पनि एक न एकदिन त्यस चिनोको करामतले तपाईंहरूको पुनर्मिलन हुनेछ । तर, आफ्नो चिनोलाई जोगाएर भने राख्न सक्नुपर्छ ।

१७
तपाईं गाउँकी युवती हुनुहुन्छ र सहरबाट आएका युवकलाई फसाउन चाहनुहुन्छ भने उनका अगाडि बाख्राको पाठी च्यापेर मात्र जाने गर्नुस् । पाठीले तपाईंको व्यक्तित्वलाई खुल्न मद्दत गर्नेछ र सहरको हिरो तपाईंदेखि भुतुक्क हुनेछन् । किनभने, सहरका युवकहरू प्रकृति र पशुपन्छीप्रेमी हुन्छन् । यो कमजोरीको फाइदा उठाउँदा प्रेम हुन्छ भने किन ‘ढुंग्रो लुकाउने ?’

१८
कुनै युवतीले तपाईंलाई एकदम घृणा गर्छिन् वा तपाईं पनि उनलाई त्यतिकै घृणा गर्नुहुन्छ भने सचेत रहनुहोस्, तपाईंहरूबीच इलु-इलुको सम्भावना प्रबल छ । जति घृणा बढ्यो त्यति नै माया गाँसिने सम्भावना हुन्छ । घृणा बदलियो भने आखिर प्रेम नै त हुने हो ।

१९
चोभार वा कुनै गोदाममा जानुस्, त्यहाँ मायाको भोकी युवतीलाई गुन्डाले ज्यादती गर्न खोजिरहेको हुन सक्छ । कानलाई चनाखा राख्नुस् । कुनै कुनाबाट युवतीको चीत्कार आइरहेको सुनिनेछ । अनि, भित्ता फोड्दै जानुस् । गुन्डालाई धुलो र युवतीलाई मायाको गुलियो चटाउनुस् ।

२०
कुनै बाधा वा कसैको कुदृष्टि परेर दुवै जना मर्नुपर्ने अवस्था आयो भने, मृत्युदेखि नडराउनुस् । नहिच्किचाईकन मर्न तयार हुनोस् । किनभने, सँगै जिउने र सँगै मर्ने कसम खाइएकै हो । फेरि, त्यसरी सँगसँगै मरेमा अर्को जन्ममा निश्चित रूपले मिलन हुनेछ ।{from:nayapatrika}